ഗന്ധർവ്വൻ

സ്മരണതൻ സുന്ദര ഭൂവിൽ നീയൊരു
ഗന്ധർവ്വനായെന്നെ തേടിയെത്തി
അഞ്ചിതൾ ചെമ്പകം പൂത്തീടവേ
എന്നെന്നും നീയെന്നെ തേടിയെത്തി
ചെമ്പകപൂമണ ഗന്ധം പകർന്നുനീ-
എന്നെ നിൻ ജീവന്റെ ജീവനാക്കി
സന്ധ്യതൻ യാമങ്ങളിൽ
നീയിളം കാറ്റായെത്തി
രാവിൻ കുളിരാർന്ന നിമിഷങ്ങളിൽ
നീയെൻ ജീവനാം തോഴനായി
ചന്ദ്രനും ആമ്പലും താരാഗണങ്ങളും
നമ്മുടെ പ്രണയത്തിൻ സാക്ഷികളായ്
മിഴിയിൽ നിൻരൂപവും നിനവിൽ നിന്നോർമ്മയും
കൊണ്ടുഞാൻ നിന്നെയും കാത്തിരുന്നു
മഴയെപ്പോലിന്നുഞാൻ സ്നേഹിച്ചു നിന്നെയെൻ
ദേവനെപ്പോലെ ഞാനാരാധിച്ചു
നീ തന്നോരായിരം ഓർമ്മകളുമായി
ഇനിയും ഞാൻ നിന്നെയും കാത്തിരിപ്പൂ.